Hloh 8 jơ pơgê năr 1/7, tơ̆ Hơnih tơm bơ̆ jang teh đak tơring sơlam teh đak Bơ Y, dêh char Quảng Ngãi hlôi đei 16 ‘nu kon pơlei năm pơm hla bơar, găh lơ pơm hla bơngai găh teh. Ƀok Nguyễn Thanh Hùng, bơngai đei pơjao chĕp pơgơ̆r Hơnih tơm bơ̆ jang teh đak tơ̆ ou, tơbăt, tơring sơlam teh đak Bơ Y đei trong sơlam teh đak hăm 2 teh đak boăl Lào păng Campuchia. Tơring đei pơjing kiơ̆ trong hơgrop hơnih jang rim tơring: Pờ Y, Đăk Xú hăm thĭ trân Plei Kần. Lăp đơ̆ng rŏng proh hơmet, tơring đei hơgăt teh să hloh 240km2, kon pơlei đei truh 35.000 ‘nu. Tơring pơjing hơnih bơ̆ jang tơ̆ Hơnih bơ̆ jang tơm thĭ trân Plei Kần, apŭng Ngọc Hồi, dêh char Kon Tum (so). Ƀok Nguyễn Thanh Hùng, tơbăt:“Hơnih bơ̆ jang teh đak đei Đảng uỷ tơring pơjao ăn 9 ‘nu kang ƀô̆ bơ̆ jang. Đĭ đăng jĭ kang ƀô̆ đơ̆ng rim tơring Pơ Y, Đăk Xú păng thĭ trân Plei Kần so mơ̆t jang lơ̆m Hơnih bơ̆ jang teh đak kơ tơring. Nhôn hlôi pơjao jang tôm tơdrong bơ̆ jang găh Mŭk drăm cham char, Choh jang sa, Tơ iung pơjing ming man, Oei sa joh ayŏ tơpôl păng Tư pháp hộ tịch. Rim kang ƀô̆ ou gơ̆h jang ‘lơ̆ng ăn kon pơlei”.

Yan ou đei ƀôh lơ̆m bơ̆ jang sơng iŏk, pơm hla bơar hô sơ ăn kon pơlei, kang ƀô̆ Hơnih tơm bơ̆ jang teh đak tơring Bơ Y hlôi ‘măn lơ jơ vă pơtho tơbăt, tơgŭm ăn kon pơlei chih kơ yuơ hlôi đei dôm tơdrong tơplih găh hơnăn tơring ou to. Đei lơ kon pơlei oei tim mă băt dang ei bơ̆n tŏk bŏk oei lơ̆m tơring ayơ kơ dêh char Quảng Ngãi. Ƀok Hoàng Hữu Sửu năm pơm hla bơar pơm tơngla teh ăn kơ 2 ‘nu kon, sơkơ̆t hơdăh, ‘măng blŭng ƀok jei tôch sơl vơ̆l. Mă lei ƀok jei ƀônh pơm la bơar gơnơm tơdrong chă pơtho chro tơ ƀôh phăl hơlăng đơ̆ng khul kang ƀô̆ bơ̆ jang ou:“ ‘Măng blŭng bu bu jei sơl vơl tơpă mơ̆n kơ yuơ đơ̆ng mĭnh dêh char Kon Tum dang ei hlôi jing dêh char Quảng Ngãi. Đơ̆ng noh đơ̆ng 3 kâp dang ei pă 2 kâp. Pơgê ou, tơdrong năm pơm hla bơar jei tôch kơ hiôk. Đe ‘nhŏng pơmai oh kang ƀô̆ bơ̆ jang tôch tơnăp, rơhao, chă pơtho tơƀôh tôch phăl hơlăng”. 

Vă kon pơlei năm pơm hla bơar rơvơn hloh, atŭm hăm tơbăt hơdăh găh hơnih bơ̆ jang kơ tơring ‘nao ‘moi kiơ̆ pơrô̆ pơrôp, tơroi tơbăt hơdăh ăn kon pơlei hloi păng tơbăt lơ̆m mạng tơpôl, đơ̆ng năr bơ̆ jang blŭng a, Hơnih vei lăng kon pơlei rim tơring jei ăn khul kang ƀô̆ sơng hơvơn, pơtho tơbăt ăn kon pơlei găh trong pơm hla bơar ou to tơ̆ hơnih bơ̆ jang ‘nao.

Lăp đơ̆ng rŏng hơgrop dêh char Kon Tum, dêh char ‘nao Quảng Ngãi đei 9 tơring sơlam teh đak hăm 2 teh đak boăl Lào păng Campuchia hăm trong sơlam teh đak hơtăih kơjung hloh 292km. 9 tơring sơlam teh đak kơ dêh char Quảng Ngãi, ‘noh đei: Bờ Y, Sa Loong, Dục Nông, Đăk PLô, Đăk Long, Rờ Kơi, Mô Rai, Ia Tơi păng Ia Đal.