Tiô pơkâ xing xoăng tíu pêi cheăng râ kong pơlê hơnăm 2025, lâp tơnêi têa kô ai 34 to kong pơlê, pơlê kong kân, tung mê ai 6 to pơlê kong kân ối tung Tơnêi têa ƀă 28 to kong pơlê. Tâi tâng ƀiên chê̆ kăn ƀô̆, kong chưk, viên chưk pêi pro xing xoăng cho lối 447 rơpâu ngế; Tâi tâng kơxô̆ tíu pêi cheăng tơnêi têa cho lối 38 rơpâu tíu; pơtối xúa vâ chê 34 rơpâu, rơlối lối 4 rơpâu tíu cheăng.

Tơpui tơno a tôh ‘na tơdroăng pơkâ kố, mâu kăn vâ môi tuăn ƀă mâu túa pơkâ xing xoăng mâu kong pơlê, pơlê kong kân ối tung tơnêi têa hơnăm 2025 ƀă hlo tiah kố, mâu túa pơkâ xing xoăng tíu pêi cheăng râ kong pơlê Chin phuh pơkâ hiăng séa ngăn tro ƀă rak tơniăn tro ƀă mâu tơdroăng hnê mơhno, troăng pơkâ tơmiât dêi râ ai hnoăng pơkuâ. Pôa Dương Khắc Mai, ngế ki lo ing Dak Nông tối rơdêi, ‘mot tơkŭm kong pơlê cho pơkâ sap nah tá chói ai. Tơdroăng klêi kơ’nâi ‘mot tơkŭm, mâu kong pơlê kô xoăng kăn ƀô̆, kong chưk, ngế pêi cheăng ƀă pơkâ pơtê mâu tíu pêi cheăng ki rơlối môi tiah lâi:

“Tơdroăng ki kal má môi drêng ‘mot tơkŭm pin ối châ rak vế mâu kăn ƀô̆ ki ai hiâm mơno pêi cheăng rơkê. Má péa, ‘na tíu pêi cheăng athế pơkuâ ngăn krá tơniăn, vâ gá pôi tá tro tơ’nhiê, kal ai troăng pêi vâ pơhlêh mâu tơdroăng cheăng xúa dêi mâu tíu pêi cheăng kố”.

Tiô pôa Trần Hoàng Ngân, ngế lo ing Pơlê kong kân Hồ Chí Minh, ‘mot tơkŭm kong pơlê, kô gum mâu kong pơlê pơkâ tíu pêi cheăng mơnhông. Tiô pôa, vâ mâu kong pơlê, pơlê kong kân mơnhông châ tơdroăng ki ai hlâu, pêi cheăng tơƀrê, lế lĕm tâ klêi ‘mot tơkŭm, mê:

“Athế pro tiah lâi mâu cheăm tung kong pơlê mê môi tuăn tơdjêp liên thong, rak tơniăn tro mâu hngêi trăng troăng klông mê ai tá hngêi trăng troăng klông kơxô̆. Tơdroă mê kal mâu kơxô̆ liăn mê tung mâu kơxô̆ liăn ki kal mê cho kơxô̆ liăn ‘na liăn ngân. Mê á xuân ối pâ thế drêng séa ngăn Luât ‘na liăn ngân tơnêi têa, mê mâu tơnêi tơníu pơla 5 hơnăm 2016 – 2030 pin athế ‘măn chôu ăm mâu kong pơlê pơlê kong kân vâ mâu kong pơlê tơ’lêi hlâu ‘no liăn pro hngêi trăng troăng klông kố”.

Pôa Nguyễn Hòa Bình, Phŏ Ngế pro xiâm hnê ngăn tơnêi têa tối rơdêi, tơdroăng ki klâ xoăng tíu pêi cheăng râ kong pơlê rôh kố cho môi rôh kăch măng ‘na tơkŭm kơ koan cheăng tơnêi têa ƀă mâu ngế cheăng. Ki xiâm cho mơjiâng pơkâ ăm tơtro ƀă mơjiâng tơnêi tơníu mơnhông cheăng kâ ai tŭm ki rơdêi, tơkŭm ki rơdêi dêi mâu kơpong, tá kơpong kong ngo xuân môi tiah kơpong têa kơxĭ. Tiô tối hdrối, hâi lơ 30/6, tâi tâng mâu kong pơlê kô tơbleăng tíu pêi cheăng nếo dêi kong pơlê, dêi cheăm, rơtế ƀă kơ koan cheăng tơnêi têa pơkuâ nếo tá Đảng ƀă kăn pơkuâ. Kơxo lơ 30/6, mâu inâi râ kong pơlê, râ cheăm kô châ tơbleăng, ƀă sap ing hâi lơ 1/7, kơ koan cheăng nếo tiô túa kăn pơkuâ kong pơlê péa pâ kô păng ‘nâng pêi cheăng.

Ƀă tiô jâ Phạm Thị Thanh Trà, ngế xiâm ngăn kong pơlê, hnoăng cheăng dêi mâu kăn ƀô̆, tơdroăng xing xoăng châ tơmiât nhên, hên kơvâ sap ing ƀăng tơnêi ki ai xêh, túa pơkâ pơ’leăng mâ mơngế troh tơdroăng pơkâ ki tá hâi chói ai, túa lĕm tro, hdroâng kuăn ngo, tơdroăng loi tĭng, troăng ngăn mơnhông ƀă hiâm mơno tơchĕng tơmiât dêi pơlê pơla.

“Xing xoăng mâu tíu pêi cheăng râ kong pơlê ngăn tung tơdroăng tơnêi tơníu ngăn lo a têa kơxĭ kân ƀă xúa ki châ pơxúa cheăng kâ têa kơxĭ ƀă ki pơxúa vâ mot tơrŭm. Khu xiâm ngăn tơdroăng kal kí, Khu pơkuâ ngăn Tơnêi têa, malối cho Chin phuh hiăng hbrâ rơnáu tâi tâng mâu tơdroăng, la mâu tơdroăng kơnía tâ mê cho mâu kong pơlê pêi pro xing xoăng, ‘mot tơkŭm, tơbleăng mâu pơkâ vâ pêi mơjiâng khu kăn pơkuâ kong pơlê 2 râ hiăng mơeăm khât”.

Tiah mê, tơdroăng xing xoăng mâu tíu pêi cheăng râ kong pơlê rôh kố ôh ti xê cho hvêa prôk ki kal tung tơdroăng pro lế lĕm kơ koan cheăng tơnêi têa xúa tơƀrê mâu liăn ngân, mê ối po troăng ăm tơdroăng mơnhông nếo, pro ivá mơdêk cheăng kâ rêh ối pơlê pơla mâu kong pơlê. Ƀă tơdroăng ki hbrâ rơnáu nhên sap ing Tơnêi têa troh kong pơlê, tơdroăng ki môi tuăn dêi rêm râ, mâu kơvâ cheăng ƀă tâi tâng kuăn pơlê, tơdroăng ‘mot tơkŭm, xing xoăng tíu pêi cheăng râ kong pơlê hơnăm 2025 tơhrâ kô pro chiâng môi ngiâ méa nếo ăm tơnêi têa, tơtro ƀă pơkâ thế mơnhông krá tơniăn ƀă tơrŭm cheăng trâu hngế tung hneăng ki nếo.